(من الرمزيات) قصيدة الجازية الهلالية(مكتوبة)

أحبها الشاعر وتعذب من اجلها وظل مفتونا بها رغم عدم مبالاتها واستهزائها به ورغم ذلك سخَر نفسه لخدمتها بل عاهدها أن يكون من خيرة جندها مثلما كان ابن الخــــواجه عامر في خدمة الجازيه الهلا لية بل واقوى فرسانها مع ذ ياب وبوزيد ولم تكن تضحية ابن الخــواجه سوى عشق وحب دفينين للجازية وظلت هي تتجاهله الى النهـــــاية ولكن من تكون حبيــبتي؟ وما وجه المقارنة يا ترى لنترك ذلك للقارىء واقـــــــول للحبيبة احبكِ حتى عليَا هازِيه

سواء تحبني وإلاّ عليّا هازيه///مازلت في حبِّك مريض عليل

مادام إنتِ في عيوني الجازيه///مكتوبلي نسهر وراك اللـــيل

سوى تحبني والاَ الحـقيقه غـايبـــه*** مـازِلِتْ في حبَك عـليل مــريض
ومازِلِتِ عايشْ والمشـاعِرِ ذايــبـــه*** ومازالْ جرح الحُبْ بـالتنقيض
وبين المآسي والزَمنْ وغــــرايبـــه*** طبع الوفى ما يدرْغِمه تخِلويض
عِشنا على حُب الوفاء والصــايبـــه*** في الصَـأيبه نملا الكاس يفيـضْ
كاس الوفاء نهدي لذيذ ربــــــايبــه*** وكاس الشَقاء ينكــبْ بتمرْكيضْ
مهيُوبْ لمْكِنتي البـلا ما هـــــايبــــه*** نقولْ للبلاء ريَضْ معايا يرِيـضْ
من نجع ما تأمنْ سـيوف مشـأيـــبه*** باقي شبابه رقيق ْ شــفـرهْ غليظْ
قالوانجوعي في الصحاري ســـايبه*** قلت الحِـمى تحمي رقيق البيض
قالوا الشقاء يطيَبْ الماهي طـأيـــبه*** قلت الهنايمرَض الماهو مريض
قالوا الفيافِي وهوشــها ومـــذايبــه*** قلت الصيوده ها يضه وتـهـيضْ
لكن هوى أم العــــــــــُيُون الرَايــبه*** جاء وادها جارِفْ مثـــيل السَـيلْ
وحلفـــــــــتْ يمين الله ماهي تايبه***وحلفـــــــــــتْ ما نركع نهار ذليل
**********
سوى تحِبْني وإلاَ المحــبه بـايعــه*** مازِلِتْ شـــارِي من قصـــدْ يبيــع

افعال الهوى وعمــايله وصنــايعه*** إرجَعْ حرارة وهجْ صيفي ربيــــعْ

وتاريخ جدَِكْ ولمْجــــادْ الضـــايعه*** تأمَلِتْهمْ في رقبــتِـكْ تـرصيـعْ
وفرْسان جالتْه الخلا ووســــايعه*** في هذبها بتهْمِــــيدها وتـــشيـيعْ
وصفْحات خطْ أشعار فيهــا رايعـه*** من شِعِرْ ولد هلال بــــيها ولـــيعْ
و سيف الوغى لذِيابْ ردْ ودايعـه*** في نهارْ بين الهزْ والتَرْجـــــيـــعْ
وغثيثْ فاتْ الحـدْ زازْ شرايــــعــه*** يصعبْ على الضَفَارفي التَجميـــعْ
علينا خطمْتي بالغِلال الفـــــايعـــه*** تبعْناك طاوعناكْ بالــــــــتطويـــعْ
ومكتوبلي يا زازيه بالشَـــــــايعــه*** العُشَـــــاق تحمِلْ دمْ للتـــــَبزيـــعْ
وكنْتي ذريعهْ وكــل حدْ وذرايـــعهْ*** وغيرطبعــنا ما نقبلِ التطـــبيــــعْ
مهرْناكْ أكبرْ مُهــرْ نفسي طـايعــهْ*** يـوم السَيوفْ مـقلـقـله تــقِلْـــقِيـلْ
رفعْناه صيتكْ رفعْ فوق رفــايْعـــه*** حـــــــكايه نقلْها جيلْ بعده جيـــل
***********
سوى صـــادقه والاَ بعقْلي لاعــبه*** إنرُدْْ المســــــافه كأنَني ما مشِيتْ
وطولْ اللَيالي والصَغى ومتـاعِبــه*** إزيدُوغريبْ الــــدَارْ في التَشْميتْ
لحِقْني كلامْ الكان سيفي راعْـــــبه*** بلاني زمـــــــاني بالــــبلاء تبْليتْ
ودربِ الوفاءومشاكله المِتْشاعـبه*** ولفْظُ الغــــــلطْ وكلـــمة التَشْميتْ
خلَِيتْ راحتْ بال نفْسي التــاعِبـــه*** ركِبْتُ الشَهـــــامه الما بنتْلي بيتْ
وخلَِيتْ مِيَهْ من الجواري مداعِبــه*** كمْ من قفيـــزْ في حـــليهُنْ عدَِيتْ
لا الكوتْ شاكي من دمار مكــاعْبه*** ولاالسَيفْ جـاوبْ يوم قال إحفيتْ
ولانبِلْ فرَغْنا نهــــــارْ مجـــــاعْبه*** ولاقالْ مرَهْ عــــلْ هـــدفْ إعميتْ
ومــادامْ إنتِ علْ حِبالِــــكْ لاعِبـــه*** وجه الحقيــــقه الحقْ مـــا ورَِيتْ
ودرْس الحيا ينْقــال للَي تُـــواعْبهْ*** ولفْظُ القــــوافي يطــــلُبِ التَحْليلْ
إرْزامْ واحِدهْ في دوَارْ تبقى تاعـِبه*** في ليلة مـــــــطر وريح وتخِلْخيلْ
**********
سوى تحِبْني وإلاَ عليَـــا بـــــــاِنيه*** حاجاتْ في الخاطِرتحِبَِي وُصولها
عدَِيتْ في لوَلْ وهــاذي الثــــــَانيه*** على جالْ حِملِ الـزَازيه وحُمولها
بتأثيرْ من نفْس عليَا جــــــــــا نْيه*** جنتْ التَعبْ في ملــحمهْ بِفْصولها
تبَعِتْ نتْبعْ في غـــرور الفــــــاِنيه*** ولايوم حان الوقتْ لأجل وصولها
وخيط الاملْ يثْلِثِشْ بــعد إمثـــانيه*** إقرَِبْ الحلْ لِخـــــــالته ومخْلولها
جنيتي وما نقدرْ نقــول الجانِيـــــه*** طغيتي طغى طـاغي يحِبْ إذلولها
ومن ظنْ ظني ما بـقيتي ظانـــــِيه*** مادامْ تِخْصي من الرَِجالْ إفحولها
بيكْ إعتنينا ومــا بقـــــيتي عــانِيه*** بفُرْسان مــا كلَتْ نهـــــار خيولها
خيامْ المتاعِبْ في الصحاري بانِيه*** يباتوا مع لذيـــــا بْ يتعــــاوولها
فاتْ موسِمُ الذَُكَارْ وإنْتِ ســـــا نِيه*** وسيره بقتْ بدلالْها ومـــــد لولها
وقدَاشْ من شاعِر سبــــاتهْ غـانِيه***عليها كتبْ أشْعـــــــــار ومواويلْ
ِوأللَي رقدْ مِرْتاحْ نومه هــــــا نِيه*** ِلْلها وصِلْ بالكـذِ بْ والتــــــدْجيلْ
*********
من قالْ يبقى حديثْ بين أجْيــــا لنا*** ومن قال سيـــــرتْنا تعيشْ إسنينْ
ومن قالْ يسْألْ شاعـرِكْ عل حـالنا*** قرونِِ مـضتْ من وين حتى لوينْ
وأشْكون تبَعْ بالـــــغِنى موَالْنـــــــا*** ومــوضوعنا شابِكْ صعيب رزينْ
ظنَيتْ في تونِس رشتْ إحبــــالنــا*** وسيـــــره إنتهتْ وما عليها سينْ
لكن ثـــــقافـة بـــــرْهُمْ وأعمالنـــا*** ومــــازاتْ فـــــي تراثهمْ سطرينْ
ومازالْ لــــلهمْ قـولْ زي أقــــوالنا*** ومــــازالْ شاعـــِرهمْ يحِبْ الزَين
رغم الزَمنْ كسَرْ حصــينْ أقْـــفالنا*** مـــــــازات سيــــرتنا لبعدِ ألفينْ
ويا شاعري شقَيتْ بين إجبــــا لنا*** وولدْ الــــخواجه إختِرتني بالعينْ
بدالكِشْ في الماضي كما ما بدالـْنا*** وإفْهِمِتْشي الموضوع ماشي وينْ
وتنسْألكْ عالزَازِيه وآبـــــالْــــــــنا*** إسْمِعْتــِشْ عليهمْ يـامتى واصلينْ
ويا صاحِبي موضـوعكم في بالنا*** أمَـــا الـزَازيه مازا تْ في التَقْديلْ
وقالوا جميله وعامْله في إرْجالنا*** ونِنْــــــهي القِصَه وزايدْ التطْويلْ
ـــــــــــــــــــــــــــــــــــــــــــــــــــ (إنتهت)